Ólafsfjörður er staðsettur á Norðurstrandarleiðinni, mitt á milli Dalvíkur og Siglufjarðar. Við hlið Kaffi Klöru er safnahús Ólafsfjarðar, Pálshús sem hýsir náttúrugripasafnið, Ólafsfjarðarstofu og setur upp margvíslegar sýningar um svæðið. Sundlaug Fjallabyggðar er í 300 metra fjarlægð og skemmtilegt leiksvæði þar rétt hjá. Frá bryggjunni í Ólafsfirði er hægt að veiða, Fairytale at Sea er með sæþotuferðir og Hótel Brimnes leigir út kajaka. Hægt er að ganga eða hjóla kringum Ólafsfjarðarvatn, niður á Ósbrekkusand og út fyrir Kleifar. Vikulegar gönguferðir á vegum Ferðafélagsins Trölla fara fram á sumrin alla þriðjudaga kl. 17.00 en auk þess er ganga einn laugardag í mánuði. Lágheiðin er mjög falleg leið sem liggur úr Ólafsfirði yfir í Fljótin. Stutt er yfir á Siglufjörð í gegnum Héðinsfjarðargöng. Sjá nánari upplýsingar um Fjallabyggð undir Upplýsingarmiðstöð.